لو مش قادر تكمل التراويح... علل الناقة بالحدو تسر !

لو مش قادر تكمل التراويح... علل الناقة بالحدو تسر !

[b][size=24]السلام عليكم ورحمة الله وبركاته

أخبار رمضان؟

ختمتم القرآن كام مرة ؟
وأخبار التراويح؟

ها بنصلي كام ركعة وبننام كام ركعة ؟
ماينفعش كده
احنا معندناش أي لياقة خالص بجد
سبحان الله

يعني شباب وأصحاء وكل ظروف الإعانة متوفرة بفضل الله
لازم نجاهد يا شباب

عشان ما أطولش عليكم

كنت عايز بس أقول نصيحة صغننة

كتير الواحد مننا مش بيلحق ينام شوية أثناء النهار ويلاقي الفطار جه، ويبقى خااااايف وقلقااااان من التراويح لأنه حاسس أنه هينام فيها

وبالفعل بعد العشاء ومع أول ركعتين يلاقي نفسه هينام ويتعب ومش قادر يكمل
يا ترى يعمل إيه

هأقول هنا نقط صغنونة لعلنا نستفيد بيها بإذن الله

أول حاجة ::
علل الناقة بالحدو تسرِ

ده مين ده بقى ؟

ده ببساطة مثل عربي معناه، اشغل الناقة بتاعتك بالإنشاد لها (الحدو) أننا قربنا نوصل خلاص... علشان تمشي وماتقفش
يعني ببساطة صبّر نفسك

قول لنفسك هما كلهم كام دقيقة والصلاة تخلص
الركعة بيقرأ الشيخ فيها ربع حزب يعني حوالي صفحتين ونص يعني يخلصوا بسرعة إن شاء الله

وكل ما تخلص ركعة قول لنفسك خلاص اللي باقي أقل من اللي فات بإذن الله
وهااااانت

بجد اقعد قول لنفسك كده (بس من غير ما تسرح في الصلاة يعني ) علشان تصبّر نفسك وتوصل بإذن الله
ولما تخلص اعزم نفسك هدية على عصير قصب (أو تمر هندي أو سوبيا للي مش بيحبوا القصب زيي)

تاني نقطة

هما بسسسس أول دقيقتين وبعدين خلاص

لما الواحد بيكون صاحي من النوم وكسلاااان ومش قااااادر يقوم من السرير ومش متخيل أنه هينزل يصلي الفجر أو يروح الكلية أو الشغل..
بيقى فعلا مش متصور أنه هيقدر

بس مجرد ما يقوم ويخش الحمام ويشرب ميه ولا حاجة بيفوق بفضل الله

فهما فعلا أول دقيقتين بس... هتصبر فيهم هتكمل بإذن الله
هتقع ومش هتقدر تصبر.. يبقى هتفضل على طول كده

تالت نقطة وآخر نقطة
تقول لي طيب أنا هأجاهد نفسي وأكمل الصلاة... بس أنا مش بأخشع
أقولك جاهد تخشع وادعي ربنا وخد بكل الأسباب

تقولي عملت كلللللل حاجة ممكنة ومع ذلك مش بأخشع.. أروح أنام بقى ؟

أقولك يااااا أخي
أنت نسيت أنت بتصلي لمين

أنت بتصلي للــــه عز وجل
الله سبحانه عليم وخبير.. سميع وبصير
يعلم حالك ويعلم شعورك ويعلم جهادك ويعلم كل ما فيك من غير ما تنطق حتى

يعني ربنا عز وجل يعلم أنك فعلا جاهدت أنك تخشع بس مش قادر..
مش زيي مثلا ممكن أقولك أنت بتمثل أو كده، لأ، الله عز وجل يعلم الواقع اللي في قلبك فعلا..

خلاص بقى يبقى ما تشيلش هم.. طالما عملت اللي عليك يبقى ثق أن ربنا هيجازيك وهيعطيك
لأنه سبحانه يعلم ما فعلته
قال تعالى (والذين جاهدوا فينا لنهدينهم سبلنا)

أقولك حاجة جميلة ؟؟
لما تكون كسلان أو تعبان وفعلا مش قادر.. أول ما تسجد قول لربنا.. اشتكيله نفسك
قوله يا رب أنا نفسي أصليلك والله بس تعبان.. يا رب أعنّي..
يا رب قويني وصبرني
يا رب ارزقني الخشوع وفوّقني

وأخيرا
تذكر الثواب العظيم اللي هتاخده بإذن الله لما تصلي
وتذكر نعيم الجنة
وحاول تتدبر الآيات وأنت تلاقي الوقت بيعدي بسرعة إن شاء الله

قال أحد الصالحين "اللهم ائذن لي أن أقوم الليل في قبري"...
مش متصور أنه في القبر هيتحرم من قيام الليل..

فسبحان الله على حالنا

ربنا يعيننا يا شباب
وهأدعيلكم وتدعولي ربنا يعيننا

واللـــه... المستعان

-----------------------------
م/ن[/size][/b]

» وقفات مع صلاة التراويح
» التراويح
» التراويح في رمضان
» صلاة التراويح
» الذكربين ركعات التراويح